Ara Mina, irita

Iritang-irita si Ara Mina nang nakausap namin nu’ng Huwebes nang gabi dahil dapat ay aalis na siya patungong Amerika para sa series of shows niya sa San Diego at Los Angeles, California.

Nakadalawang-balik na si Ara sa US Embassy para ayusin ang kanyang working visa pero hindi pa siya nabigyan dahil sa kulang ang papeles na dapat ay ipadala ng kanilang producer.

Ang ikinaloka pa ni Ara, mali raw ang ini-apply sa kanya ng producer samantalang tama ang kina Freddie Aguilar at Ella V na kasama niya sa mga show roon.

Nakaalis na nu’ng Huwebes sina Freddie at Ella pero si Ara ay hindi pa dahil sa hinihintay pa niya ang kulang na papeles para maayos ang kanyang working visa.

Sa Sabado na raw ang unang show niya sa San Diego, pero nandito pa siya. Dapat kahapon ay nabigyan na siya ng visa dahil sarado ang US Embassy pag Sabado.

Gusto nang magpa-interview ni Ara sa mga TV show para makarating ang nangyari sa Amerika at mapanood ng ating mga kababayan doon.

Mahirap na raw at baka siya pa ang babaliktarin ng kanyang producer. Todo na raw ang promo roon na kasali siya sa show, kaya baka ibahin daw ng producer ang kuwento kung hindi siya makarating.

Kailangang ipaliwanag ito ni Ara para malaman ng mga kababayan natin doon sa Amerika kung ano ang tunay na dahilan ng di niya pagsipot.

As of Thursday night ay umaasa pa rin ang aktres na makaalis siya. [source of news]